女友生日

星期三那天是女友生日。我們好像一兩個星期都沒見過面呢。

我送了一個音樂盒，上鏈時後會播happy birthday生日歌。還有2張心意卡。

可惜我不能吃蛋糕……

在荃灣西附近行了半日，行行海滂商場。

但是，不知是太過高興還是怎麼，竟忘了影相留念……哎

瑪麗

去到瑪麗醫院，等了成個幾鐘，先見醫生。醫生話我肺功能弱，要俾肺科醫生睇下。之前做過2個肺功能測試，分別51同55分，但佢話正常後生仔要有80分，雖然移植要求要50分先做得，但想睇下我有冇問題。心諗，個陣已經做得好辛苦了，吹氣吹到攞命……原來都係差咁遠。

這麽多年來，都常有這種感覺。就是無論我怎樣努力，最後都係白費居多。今次，又是這般。

骨髓移植有很多難以想像的事，例如併發症，亦會減弱肺功能。而家的我肺功能已經弱，移植時應會變得更差。

醫生另外亦話捐贈俾我的人同我的血球可以話完全吻合，8個點都相同。

骨髓移植，我自己上網search過，知道好大風險，可能有的負作用，排斥同併發症都極多，根本冇辦法預計。仲有，做完唔代表冇事，只係得5成機會好返，患其他癌症的機率亦會增加好多。

你問我驚唔驚？我唔識答。我就係想盡快結束這一切的煎熬。生定死，算了。

黃金海岸

今天與媽媽到了黃金海岸。
這裡風景挺美的。

今日又去了河邊跑，比上次跑多一分鐘，11鐘，諗着逐次加上去。

跑完很累。明天又要去瑪麗醫院了。
今晚都是早點訓，跑完腳還有點酸。

健身單車

之前買的健身單車今日送貨。玩佐一陣，都氣喘喘，好似幾有用。

今日9點到起身，訓佐成11個鐘，不知道是否新服的口服藥問題，常常想睡覺。11點鐘返到醫院覆診見周姑娘，睇埋昨日抽血報告。正常。她還講講移植時情況，電療時會怎樣，要之後買幾套短衫短褲。我知電療真的很傷。但沒辦法，我沒有其他選擇。

還有，瑪麗醫院要我們3月21日去那裡開會。

我想距離骨髓移植的時間不遠，雖還未知確實日子。我都冇咩好做了，股票又損手，冇咩動力留意了。唯有做多點運動……

又係抽血

近排好懶訓，今朝訓到好妟先起身。明明琴晚提早了一個鐘，10點半訓覺，今日9點起，食完早餐又訓返，仲訓到去12點。

唔知係咪身體虛，訓極都唔夠。

去到妟晝，先去醫院抽血。抽完血，同阿媽返去屋企樓下河邊行佐陣。

好耐都冇行過這條路，都起碼成年。記得retake高考個年，每個星期總會幾日在這裡緩步跑。但高考完後，在百佳搵到份part time做冇咩時間就冇跑了。

在這裡跑都幾舒服，遲多幾日落黎跑下先。

明天朝早又要返醫院見姑娘。

嬸嬸……

星期一收到一個不好的消息。當天朝早，在大陸的伯伯打電話來找阿媽聽，但阿媽出了去買餸。如是者，他每隔半個鐘都打來。

阿媽返來，我們都諗大陸那面應該有事發生，不然不會找得那麽急。

原來是一個惡耗……嬸嬸在星期日晚因交通意外逝世了。阿媽掛了電話後眼泛淚光，心情忐忑。我得悉後，也覺心頭一震。

人生真的很無常。老豆偷度來香港，我一出世就在香港，不是經常回鄉，所以自己同大陸那裡的親戚都不算熟稔，尤其是父親家那邊。不過小時候，暑假會返鄉下同堂表兄弟玩，但後來就愈來愈少見面了。記得那時，有時會到叔叔家，嬸嬸幫過我沖涼。

雖然平時和叔叔家沒有聯絡，但始終親戚嘛，血濃於水，聽到這壞消息，都為他們一家難過。

他們所經歷的，和我地一家都類似。我剛剛升上大學，本應開開心心，成家人都有盼望，對未來充滿希望。

叔叔一家又可嘗唔係，個細仔即我堂弟剛參完軍幾年回來，入佐鄉下大隊做，我諗應該係民警之類；個大仔同叔叔都係打政府工，本應該一家人開始有福。豈料，上天每每就在人最開心的時候，給你最無情的打擊……

鄉下的親戚都還未有告訴年紀老邁的阿嫲知道，加上近來有病痛，怕她接受不到。

如果沒有這個病，我可能可以回鄉送她一程。老豆星期一都返佐去，但返到黎冇咩點講野。

記得上一次見她時，應是上一年的清明拜山時。她當時還叫我食燒豬肉。嬸嬸應是在家族裡算為較活躍開朗健談的一個。當時其實我已發病了，不過腳痛完又唔痛，仲未確診。估不到一年後，再見不到她了……

這次交通意外係醉酒駕駛而成，嬸嬸食完晚飯到海月岩公園散步時給醉酒的士司機撞倒。除了她，好似還有幾個人，有的傷，有的不行……飛來橫禍，真的令人無奈與唏噓。都係個句「飲佐酒就唔好揸車」，不過禍福誰能料到？

而我的命運跟着會如何？？

懶

這幾天天氣較潮濕，濕氣重，令人精神恍惚，易瞌睡。加上自己懶，懶得打blog。

上星期三照樣去抽血，星期四就見了醫生。醫生給了我口服藥，話㩒着我個病。要食多2種藥，一種係一個星期食一次，每次4粒；另一種每日一次一粒。

之後星期六仲做埋肺功能測試，原來係上次係瑪麗醫院做得唔好要做多次。個測試不是普通吸氣呼氣，好鬼難。記得上次在瑪麗，排我前面個阿嬋都做得好過我，我反而做了好多次，醫生都話唔過關，最終要做多人地多幾set。但是，原來都係唔得，要在屯門醫院做多次。

星期六去到，個therapist幾好人，但講野好快，好采我之前做過知點做，好快做完返歸，今次得啦呱。

星期日，何c當然又黎探我：)

擁有共同珍貴回憶的朋友

昨天莊員們探了我，今次是Aaron,Sam,Patrick來。
他們都很有心，每隔一段時間都來我家。
又一次輕鬆快樂談天。

朋友有很多種，他們就是那種有共同珍貴回憶的那一種。我們未必性格盡同、志趣相投 ，但聚首一堂，總會暢談往事，勾起上莊的回憶。即使支莊最後都搞不起，分崩離析，有些成員也難以維繫，但是我們間開心的事也很多。這些回憶是一生難忘，也是我一直以來第一次和這麼多人共同做同一件事，是愉快的、耐人尋味的。這種朋友，佔據你人生中很重要畫面，和你一起突破成長的樽頸位。

這種朋友會讓你想起「那些年」的青春。昔日我們為promotion period作準備，一起忙碌了幾個星期，一齊「度橋」，搞decoration，熬過幾個通頂，去出席其他society同其他大學友soc的inauguration。這些回憶，想必是難得的。

不過，真的沒想到竟然得患這大病......大學生活對我來說，好像一切都化為烏有。將來讀書與否都是將來的事，現在不想去諗，有命才算吧。以前咁辛苦讀為乜呢，高考都給我考了2次才上了科大，以為大好前途，我而家咪又係坐係到，仲要有這個重病。講真，這個打擊非常沉重，我都無話可說了，只能說造化弄人。講到「黑」，都不是今時今日開始了，由中學低form個時都已經開始了，很多意想不到的事我都領略過。本以為進了大學歹運會離我而去，year 1 確實真的很開心，點知就真係開心了1年而言，就中伏「入廠」了。算吧，我最少也開心過，黑就黑啦，以我而家的情況都沒什麼好怕了，聽天由命，活得幾耐得幾耐啦。

然而，回想起來，上莊期間，我想我亦有很多要改善的地方......
始終我份人都係內向，對人不十分熱情，很多時都沒有主動關心莊員。有些後悔沒有和一些成員溝通多些，友情是雙向的，奈何當時忽略了這一點。
應該有事情要搞，就好盡早搞好，個ｄ財務報告本應可以早ｄ搞好，更無奈係無耐就得佐呢個病，遲了很久先搞掂。哈哈，有些事情真是難以預計，事情要做的就盡快完成不要拖。
還有，老實說，我們莊員間溝道不足，事情不滿，往往都沒有和盤拓出。無形間各自充滿怨懟又沒有疏導，分爭難免。

上莊這回事，後來諗，歸根結底，靠的是友誼維繫。搞這些學會，冇pay，分分鐘自己仲要倒貼，搞落去的動力不外乎學野、見識同識到班friend。當然，留低的話就算學到野，同人唔岩嘴形，最終你都會冇動力繼續上路。奈何，因各種原因，當時支莊都係熟唔黎，有些可叫做同事關係。

不過，這不能怪誰怪某某。人夾人緣，只是我們不太夾吧，可能是性格，可能是緣份，誰對誰錯誰能判斷呢。畢竟，上莊一事只是人生一段小插曲，悠悠人生應該忘記背後，努力向前。

最起碼都有枝筆做紀念。