嫲嫲

近這個星期在鄉下的嫲嫲跌傷了，入過院。早幾日仲話可能唔得了。
老豆番過去幾次。

前幾日夜晚情況嚴重了，老豆第二朝就返佐去了。

但返到去，佢又好似好d。佢而家已經行唔到了。股骨裂了，但佢都90幾，唔肯俾佢做手術，驚佢頂唔住。

又請佐工人服侍佢。

阿嫲，有唔知幾多個女，有3個仔，包括老豆，老豆排中間。3個都冇錢。

伯伯同叔叔成日都為錢銀嘈。

叔叔同大仔成日飲酒，醉了又吵鬧。
我們王家都不知怎麼了……

好耐冇跑步，今朝跑返，冇咩氣，唔夠十分鐘就停佐。
跟著玩佐陣拉力繩。

晏晝開始在ipad上睇資治通鑑。據說毛澤東看過十七次。哈哈，始於我都係歷史人。

臨訓前冥想一下。由前日開始，每日二十分鐘。冥想的感覺幾好。

姨媽來了

今日又抽血，去返血科揾周姑娘講解骨髓移植。佢好細心咁講，佢可以話係我見過最好的姑娘，上佐年紀樣仲keep到，又好相與。

講佐都幾耐下，大概關於買底衫，喉仔護理。
又俾佐張紙我，下星期一去瑪麗醫院，去放射科度位。

跟著落佐去X光部去拎張野裝希克文導管。
點知落到去撞正食飯時間，等佐半個鐘下午1點9先開。

去完X光部又要去C9內科病房，又要搞文件手續。等佐半個鐘先搞掂。6月4日我會入院抽骨髓，5號裝喉仔。

又係6月4日，上年的當日我腳痛到癲，那晚在天后廟給一個神婆驅邪。年年六四都諗著去遊行，點知都係冇成事。算了，今日唔打咁多，留返個日打。

搞掂哂所有野，都成3點，返到屋企都3點幾。好餓。

食完碗米粉冇耐，姨媽就來到。

蜘蛛俠

而家睇緊蜘蛛俠。
係新個套，都幾好睇。
[ff mode]如果我是蜘蛛俠　你話幾好呢

琴日在高登開佐個post，呼籲d人捐血同骨髓。都有人回應同俾好評。
如果真的有人因為我個post而走去捐血，咁我都叫做佐件好事:)
http://forum2.hkgolden.com/view.aspx?message=5127143&highlight_id=0

哈哈

真的很悶

好苦悶。
我諗我真的盡了力，去經營我的人生了。

我真不忿我會有如此下場。

移植要延期

琴日收到消息，移植要延期了，因為捐贈者時間不合，要延至６月２０日。
希望這次是真確的。

多麼希望快點去移植，快點回愎正常生活。
移植後又要休養，一般又要休養９個月至１年。

如果由７月計起，７，８，９，１０，１１，１２，１，距離下年大學spring sem開學，俾到盡都係７個月。

原本我希望２０１５年spring sem就可以番學，而家我諗好難。
不過真的好希望可以到時返到學啊!!!!!!!!.........

生日

今日生日。
我發覺愈來愈少朋友了，更何況本身都少。

上年生日，都叫做有班fd食下飯。算叫做有人同我興祝。

今年，happy birthday。真係happy唔到。

上年的今日，我以為大學生活會好，唔似中學咁灰。諗返起，真係天真。

中學咁多年，都冇人陪我過生日。回憶起上年，其實真的幾難得。原來我一直以來都是隻影單行，自己以為一個人冇咩問題，但係到今時今日真的只剩下自己了……

很狐獨……

今朝去佐簽同意書。之後返屋企，思然下午來了，送了我2本書同一個手機座。

其實，在不久前，發覺和她的關係好像不如從前了……但這個女孩很好了，在我生命中，她是繼媽媽對我最好了。她陪伴了我一整年，我很感激她。為了我，她已犧牲很多時間啦。這情誼，很難得。我也真心喜歡她。

最近爸媽身體都唔好。老豆留過幾次鼻血，琴晚去佐睇急症，但佢話等佐幾個鐘，又冇藥食。之前佢都排佐期去檢查鼻咽，但要等到出年先做。

明天要跑步，鍛鍊下，為移植做準備了。遲下要裝希克文導管，護娘話即使移植完都要keep返一段長時間，應該之後好耐都做唔到運動了。

差不多要移植

今日，周姑娘打黎話叫我聽朝返去簽同意書，係心口裝個導管，作移植用途。

佢話19至28日揀一日裝。可能30日去入瑪麗醫院做移植。

我諗差不唔多啦，就快做了。

仲有個幾鐘，我就22歲生日了。

記得上年大學班fd同我夜晚食佐餐茶餐廳，幾開心的。咁就一年了。

肺?

今日打返俾血科，問返幾時有得睇肺科。周姑娘話上星期去荃灣港安醫院的電腦掃瞄照唔到有問題。

我心諗：吓！？竟然冇問題！？

如果冇問題，點解我換氣功能會少佐４分１的？？

佢話會同瑪麗醫院個邊溝通下，睇下個邊Ｄ醫生使唔使我再睇肺科，叫我星期五再打俾佢睇下點。

哈，真係唔知咩問題了。

荃灣

琴日照完肺的電腦掃描，就和爸媽逛了荃灣。

到晚上，在大家樂吃飯。又係叫焗豬排飯。但食食下發現d飯好硬。生米。
拎去換佢又肯，其實都食佐好多。換佐個叉燒飯。

行到很累。

今日訓到成10點成先起身。成日冇咩精神，完成我個igshop logo。