今天開始一連2日打化療。
在這裡可以話不敢偷閒。
都幾多野做。好多野都要量要記，小便，大便，食物。
朝早7點就嗌醒量血壓，量完又訓過，到8點半，就食早餐。
食完早餐，就好快要沖涼。
9點幾開始包喉仔，包佐幾個字。
呢度嚴d 比屯們醫院。
漱口水都有3種，鹽水、普通漱口水、人工唾液。
仲要分開時間嗽。
化療藥打完，而家有時打嗝，係副作用。
仲吊緊鹽水，因驚我膀胱太傷。
食完晚飯後，好似冇咩小便。
姑娘入黎叫我磅重。
咦，今朝先69，一睇72.5。
就幫我打去水針了。
打完好快就有。因我要記錄容量
8:20pm 300ml
8:30pm 300ml
8:45pm 100ml
9:05pm 300ml
一個鐘去四次。
而家又睇返悶悶野，資治通鑑，我真係條歷史jj。
媽媽打黎，call back her sin
前2天還未調節過來，今天打得詳細點。
今日是day-6。
都是在打抗生素中。
另外，今日亦要打化療背隻針。打完後要躺在床上6個鐘，盡量唔郁。
其實都幾多野做。
伙食比我想像中好好多，有得選擇3個餐，每日都唔同。要多要少，任我點。
最麻煩的就是要記錄很多事，飲過幾多水，食過幾多野，小便……都要記錄。
黎緊，能力許可，都要記下這移植的日子。
近排，開始睇纏論。纏中說禪，這個博客真係勁，作者已經仙遊，但佢學識淵博，可以套入去炒股到，高水準。
原來呢度冇wifi，我仲以為有。香港政府真係要諗諗佢。上網search，其他鄰國如新加坡，好多國家醫院都提供wifi，反觀香港好多野都落後。
而家都係用緊手機上網，希望d數據能夠令我享用之後的日子。
今日又抽血，去返血科揾周姑娘講解骨髓移植。佢好細心咁講，佢可以話係我見過最好的姑娘，上佐年紀樣仲keep到，又好相與。
講佐都幾耐下，大概關於買底衫，喉仔護理。
又俾佐張紙我，下星期一去瑪麗醫院，去放射科度位。
跟著落佐去X光部去拎張野裝希克文導管。
點知落到去撞正食飯時間，等佐半個鐘下午1點9先開。
去完X光部又要去C9內科病房，又要搞文件手續。等佐半個鐘先搞掂。6月4日我會入院抽骨髓，5號裝喉仔。
又係6月4日，上年的當日我腳痛到癲，那晚在天后廟給一個神婆驅邪。年年六四都諗著去遊行，點知都係冇成事。算了，今日唔打咁多，留返個日打。
搞掂哂所有野，都成3點，返到屋企都3點幾。好餓。
食完碗米粉冇耐，姨媽就來到。
今日生日。
我發覺愈來愈少朋友了，更何況本身都少。
上年生日，都叫做有班fd食下飯。算叫做有人同我興祝。
今年，happy birthday。真係happy唔到。
上年的今日，我以為大學生活會好，唔似中學咁灰。諗返起，真係天真。
中學咁多年，都冇人陪我過生日。回憶起上年，其實真的幾難得。原來我一直以來都是隻影單行，自己以為一個人冇咩問題，但係到今時今日真的只剩下自己了……
很狐獨……
今朝去佐簽同意書。之後返屋企，思然下午來了，送了我2本書同一個手機座。
其實，在不久前，發覺和她的關係好像不如從前了……但這個女孩很好了，在我生命中，她是繼媽媽對我最好了。她陪伴了我一整年，我很感激她。為了我，她已犧牲很多時間啦。這情誼，很難得。我也真心喜歡她。
最近爸媽身體都唔好。老豆留過幾次鼻血，琴晚去佐睇急症，但佢話等佐幾個鐘，又冇藥食。之前佢都排佐期去檢查鼻咽，但要等到出年先做。
明天要跑步，鍛鍊下，為移植做準備了。遲下要裝希克文導管，護娘話即使移植完都要keep返一段長時間，應該之後好耐都做唔到運動了。
今日又去覆診。又係見劉醫生。呢個女醫生真係我見過當中，最難相與。
口黑面黑，講野mean，難以理解。
佢原本幫我去book去做掃描，但有個方法以淋巴癌病人去book，就可以去私家醫院去照。呢個計劃係俾淋巴癌病人，去照胸口有冇淋巴瘤。
我呢d血癌原本係做唔到。佢詐第當我係淋巴癌先得。其實要唔該佢，佢身為醫生係有風險的。
個時我講佐句，“我係淋巴性淋巴瘤”，我呢個病，急性淋巴性白血病的另一個名。我原本係想話問清楚佢2者有冇分別，淋巴癌同白血病點分，因我上網睇其實治療方法同病理都一樣。
點知佢好似發惡咁，佢以為我話佢唔應該咁做。哈哈，我當頭呆佐，我唔明佢，佢唔明我，睇完佢先諗返起，先知佢會錯意。
臨走個時俾佐張申請延續傷殘金ge form佢，點知佢又串貢貢咁講話而家係睇病時間，唔做行政野，又話唔可以咁自私咁話，又話醫生姑娘都要食飯，好多病人係出面。
我鬼知你幾時做幾時點樣呢，社署只係叫我俾醫生就算，唔洗我follow。佢就咁叫我擺低，睇都冇睇。
事後諗返起，都唔知會唔會幫我搞。
佢呢個人講野真係令人摸不著頭腦。冇溝通技巧。so mean。好奇怪。又會俾佢做得到顧問級都有。
不過，算了。佢令我快d做到肺電腦掃描就算啦。
聽日3點去荃灣港安醫院都照。
這個是我的出生地。
係了，之前個心臟超聲波冇問題。我諗我要有心理準備，是肺有唔知咩ge情況，肺纖維化都有可能。算了，諗來諗去都係冇用的。
做人其實真係幾難，受苦，受完一樣又到另一樣。
近排看了些佛經，有地藏經。輪迴轉世，生老病死，不停重覆，真的好無聊。用呢個邏輯解釋，可能我前前世世做錯事，今世受返這個果。要改變命運，就要行善積德。
算了，命運這回事……我handle不到了。
星期一收到一個不好的消息。當天朝早，在大陸的伯伯打電話來找阿媽聽，但阿媽出了去買餸。如是者，他每隔半個鐘都打來。
阿媽返來，我們都諗大陸那面應該有事發生，不然不會找得那麽急。
原來是一個惡耗……嬸嬸在星期日晚因交通意外逝世了。阿媽掛了電話後眼泛淚光，心情忐忑。我得悉後，也覺心頭一震。
人生真的很無常。老豆偷度來香港，我一出世就在香港，不是經常回鄉，所以自己同大陸那裡的親戚都不算熟稔，尤其是父親家那邊。不過小時候，暑假會返鄉下同堂表兄弟玩，但後來就愈來愈少見面了。記得那時，有時會到叔叔家，嬸嬸幫過我沖涼。
雖然平時和叔叔家沒有聯絡，但始終親戚嘛，血濃於水，聽到這壞消息，都為他們一家難過。
他們所經歷的，和我地一家都類似。我剛剛升上大學，本應開開心心，成家人都有盼望，對未來充滿希望。
叔叔一家又可嘗唔係，個細仔即我堂弟剛參完軍幾年回來，入佐鄉下大隊做，我諗應該係民警之類；個大仔同叔叔都係打政府工，本應該一家人開始有福。豈料，上天每每就在人最開心的時候，給你最無情的打擊……
鄉下的親戚都還未有告訴年紀老邁的阿嫲知道，加上近來有病痛，怕她接受不到。
如果沒有這個病，我可能可以回鄉送她一程。老豆星期一都返佐去，但返到黎冇咩點講野。
記得上一次見她時，應是上一年的清明拜山時。她當時還叫我食燒豬肉。嬸嬸應是在家族裡算為較活躍開朗健談的一個。當時其實我已發病了，不過腳痛完又唔痛，仲未確診。估不到一年後，再見不到她了……
這次交通意外係醉酒駕駛而成，嬸嬸食完晚飯到海月岩公園散步時給醉酒的士司機撞倒。除了她，好似還有幾個人，有的傷，有的不行……飛來橫禍，真的令人無奈與唏噓。都係個句「飲佐酒就唔好揸車」，不過禍福誰能料到？
而我的命運跟着會如何？？
這幾天天氣較潮濕，濕氣重，令人精神恍惚，易瞌睡。加上自己懶，懶得打blog。
上星期三照樣去抽血，星期四就見了醫生。醫生給了我口服藥，話㩒着我個病。要食多2種藥，一種係一個星期食一次，每次4粒；另一種每日一次一粒。
之後星期六仲做埋肺功能測試，原來係上次係瑪麗醫院做得唔好要做多次。個測試不是普通吸氣呼氣，好鬼難。記得上次在瑪麗，排我前面個阿嬋都做得好過我，我反而做了好多次，醫生都話唔過關，最終要做多人地多幾set。但是，原來都係唔得，要在屯門醫院做多次。
星期六去到，個therapist幾好人，但講野好快，好采我之前做過知點做，好快做完返歸，今次得啦呱。
星期日，何c當然又黎探我：)
今天一早，4個皮膚科醫生走上來找我。
早幾日胸口對上，大脾，背脊都出了些紅疹。
等了幾日，終於都給藥膏我。
醫生說應是類固醇的關係，才會出疹。
現在和暖多了。
吃中飯時，隔離床的阿伯又我講他的political view。
他見到電視新聞中曾偉雄有關「佔中」的意見，就話曾偉雄係做得最好的警務處處長，我笑而不語。
阿伯就不時就話佔中是傻，又話學民思潮班友收佐錢，由黃毓民培養。
言談間佢話係香港出世。
心諗，傻的嗎。幾十年人，香港出世，都係咁。
係了。阿伯平時睇開亞視，在病房裡，我大多都不看電視，開機轉台都是他一手包辦。佢真係日又睇夜又睇，都係亞視。我想，CCTVB都好D呀，亞視日日係到播佢首大俠霍元甲，話係台歌，洗了我腦。
我都不屑和他討論這些問題。
我知道講政治話題，政見不同，每每都不歡收場。
即使給我拗贏又如何呢，咪又是在醫院。哈哈。
Alevel retake時新修政府與公共事務這冷門科，自己對香港政治問題都有些基本了解吧。
香港很多基本引以為傲的東西，都逐步給共產黨扼殺，我們好像只能坐而待斃。THIS CITY IS DYING. sad but true.
與其在玩由共產黨自己設下規則的遊戲而沒落，倒不如抗爭。
佔中，我想去啊，奈何我還在治療中……
寒意砭人肌骨，天文台話今天是入冬以來最冷。
市區氣溫7度，屯門這裡只有更冷。
但在醫院，室內很暖。
有時候諗，我活了21年，但其實對這世界沒甚貢獻。
現下我的狀況更難以去想，不是在醫院就是家裡，談甚麼貢獻社會呢。
如果我真的不行了，我想我應捐出器官和遺體。
可是，在網上查過，血癌病人不能捐贈器官的，因血液的癌細胞遊走身體各處。
我還以為眼角膜行吧，誰知也一樣……
如果器官不能捐贈的話，那就我的遺體吧……我查過，港大中大醫學院都會接收，作教育用途，算叫做作件好事吧。
曾經想過驚天動地幹番事業出來，可是現下我已是這般田地了……如果真的要死，那就讓我為這世界做點少少事情吧。
